Fréttir

KVENNASTARF GM

15.01.2016

Nú fara Kvennapúttkvöldin vinsælu á vegum Kvennanefndar GM að hefjast í Vélaskemmunni á Hlíðavelli. Kvennapúttið fer fram á þriðjudagskvöldum milli klukkan 19:30 og 21:30 og fer fyrsta púttkvöldið fram þriðjudaginn 19. janúar.

Alls verða 10 púttkvöld í vetur, 9 púttmót og 1 kvöld þar sem golfkennari kemur og fer yfir grunnatriðin í púttunum.

Mótsgjald fyrir alla púttmótaröðina (9 skipti) er 2.500 kr og innifalið í mótsgjaldi er kaffi og bakkelsi að loknu móti. Að lokum gilda 4 bestu mótin af 9 í heildarkeppninni.

Hvetjum allar áhugasamar GM konur að vera með frá byrjun og taka þátt í skemmtilegu kvennastarfi í frábærum félagsskap!

LIÐAPÚTTMÓTARÖÐ GM - STAÐAN

14.01.2016

Fyrsta mót Liðapúttmótaraðar GM fór fram í gærkvöldi. Alls mættu 8 lið til leiks og tóku þátt í mótinu og var góð stemming. Leiknir voru tveir 18 holur hringir þar sem skor 2 bestu skor liðsins töldu. Margir léku vel og ljóst að keppnin verður hörð. Liðin tóku mótinu misalvarlega og m.a. fjárfesti liðið "Skytturnar 3" í liðsbúningi eins og sjá má á meðfylgjandi mynd.

Enn er mögulegt fyrir fleiri lið að bætast við en 4 bestu mótin af 6 gilda. Því er um að gera að safna saman í lið og mæta næsta miðvikudag 20. janúar og taka þátt. 

Staðan að loknu fyrsta móti er eftirfarandi:

1. Three Muskateers (Ásbjörn, Hákon, Hilmar) - 109 högg
2. Skytturnar 3 (Aron Skúli, Björn Óskar, Elís Rúnar) - 109 högg
3. 007 (Eyþór, Gunnar, Halldór) - 111 högg
4. Mjöðhnoðrarnir (Anna, Baldur, Jónas) - 114 högg
5. Ásarnir (Bjarnþór, Gunnar, Bragi) - 115 högg
6. Tíglarnir (Karl, Sigurður, Ásgrímur) - 118 högg
7. Spaðarnir (Jóhann, Sigurður, Guðmundur) - 118 högg
8. Vargar (Guðni, Jón Kjartan, Guðgeir) - 118 högg
9. Púttklíkan (Birgir, Brynjar, Sigmundur) - 122 högg

 

 

LIÐAPÚTTMÓTARÖÐ GM

13.01.2016

Fyrsta mót Liðapúttmótaraðar GM fer fram í kvöld, miðvikudagskvöldið 13. jan. Þó nokkur lið hafa skráð sig til leiks og því ljóst að hart verður barist. Keppni hefst klukkan 20 og stendur til klukkan 22. Ekki verður hægt að hefja leik eftir klukkan 21:30. Mótsgjaldi er stillt í hóf og er einungis 3.000 kr pr. lið (1.000 kr á mann) fyrir alla mótaröðina.

Liðapúttmótaröð GM verður leikn næstu 6 miðvikudaga (13., 20., og 27. janúar og 2., 9., og 16. febrúar). Leikið verður í 3 manna liðum þar sem 2 bestu skor liðsins telja í hverju móti. Í hverju móti verða leiknar 36 holur (2*18 holur) og verður skor liðsins samanlagt skor tveggja bestu skora liðsins. 4 bestu mót hvers liðs af 6 telja og veitt verða verðlaun fyrir efstu 3 sætin.

Mótsgjald í Liðapúttmótaröð GM: 3.000 kr pr. lið (1.000 kr á mann)
Mótsgjald fyrir alla mótaröðina (6 skipti)

Skráning í Liðapúttmót GM fer fram með tölvupósti á netfangið golfmos@golfmos.is eða í vélaskemmunni á Hlíðavelli þann 13. janúar.

GM BORÐ Á ÞORRABLÓTI AFTURELDINGAR

10.01.2016

Golfklúbbur Mosfellsbæjar ætlar að taka þátt í Þorrablóti Aftureldingar sem fer fram laugardaginn 23. janúar í íþróttahúsinu við Varmá. Þorrablót Aftureldingar hefur verið gríðarlega vinsælt í bæjarfélaginu undanfarin ár og stefnum við á að safna öllum GM félögum saman og fjölmenna.

Frábær dagskrá er á Þorrablótinu en veislustjóri er Sóli Hólm. Ingó veðurguð, Sverrir Bergmann og tríóið Kókos sjá um tónlistina og því alveg ljóst að ekkert mun vanta upp á stuðið.

Miðasala er hafin á Hvíta Riddaranum og er miðaverð 7.400 kr. Þeir GM félagar sem hafa áhuga þurfa að ganga frá miðakaupum sem fyrst og skrá sig síðan í kjölfarið á GM borðið með tölvupósti á golfmos@golfmos.is.

OPNUNARTÍMI ÆFINGAAÐSTÖÐU OG VETRARSTARF

10.01.2016

Nú er kominn tími til að dusta rykið af kylfunum og hefja æfingar fyrir vorið. Æfingaaðstaða GM er staðsett í vélaskemmunni á Hlíðavelli en þar er bæði hægt að æfa lengri og styttri högg. Allt að fjórir geta slegið í net í einu og einnig er góður 9 holu pútt og vippvöllur þar sem gott er að æfa stutta spilið.

Kvennakvöld GM hefjast þriðjudaginn 19. janúar en dagskrá þeirra verður kynnt sérstaklega í næstu viku.

Liðapúttmót GM verður leikið á miðvikudagskvöldum næstu 6 miðvikudaga (13., 20., og 27. janúar og 2., 9., og 16. febrúar). Leikið verður í 3 manna liðum þar sem 2 bestu skor liðsins telja í hverju móti. Í hverju móti verða leiknar 36 holur (2*18 holur) og verður skor liðsins samanlagt skor tveggja bestu skora liðsins. 4 bestu mót hvers liðs af 6 telja og veitt verða verðlaun fyrir efstu 3 sætin.

Skráning í Liðapúttmót GM fer fram með tölvupósti á netfangið golfmos@golfmos.is eða í vélaskemmunni á Hlíðavelli þann 13. janúar. 

Opnunartímar og dagskrá í æfingaaðstöðu GM:

Mánudagar:
8:00-13:00 - Opið hús

Þriðjudagar:
8:00-15:00 - Opið hús
20:00-22:00 - Kvennakvöld (Hefjast 19. janúar)

Miðvikudagar:
8:00-20:00 - Opið hús
20:00-22:00 - Liðapúttmót GM

Fimmtudagar:
8:00-15:00 - Opið hús
20:00-22:00 - Opið hús

ÚRSLIT ÚR PÚTTMÓTUM HELGARINNAR

04.01.2016

Tvö púttmót fóru fram hjá GM síðastliðna helgi. Leikið var Áramót á gamlársdag og einnig var leikið hefðbundið vetrarmót laugardaginn 2. janúar. 

Úrslit mótanna varð eftirfarandi.

Gamlársdagur - Áramót

1. Jón Hilmar Kristjánsson 23pútt 
2. Bjarnþór Erlendsson 26 pútt 
3. Theodór Karlsson 26 pútt

Sigurvegari í vippkeppninni.
Baldur Skúlason.

Vetrarmót 2. janúar

1. Gunnar Árnason 25 pútt. 
2. Páll Ásmundsson 27 pútt. (eftir bráðabana)
3. Jóhann Edvin Weihe Stefánsson 27 pútt. (eftir bráðabana)

Hátt í 40 keppendur léku í báðum mótum og ljóst að púttmót vetursins mælast vel fyrir hjá félagsmönnum. 

Næsta mót er áætlað laugardaginn 9. janúar 

PÚTTMÓT Á GAMLÁRSDAG OG 2. JANÚAR

30.12.2015

Gamlársdagur - glæsileg verðlaun!
Á morgun, Gamlársdag, fer fram skemmtilegt púttmót í vélaskemmu GM á Hlíðavelli. Mótið verður að mestu með hefðbundnu sniði en einnig verður keppt í skemmtilegum vippþrautum. 

Húsið opnar klukkan 9:00 og verður heitt á könnunni. Hægt verður að hefja leik um klukkan 9:30 fram til 10:30. Ekki verður hægt að hefja leik eftir klukkan 10:30. Hægt er að ganga frá skráningu í mótið með því að smella hér en einnig er hægt að skrá sig á staðnum.

Hvetjum alla félagsmenn til þess að fjölmenna í skemmtilegt mót með bæði pútter og vippkylfu! Glæsilegir vinningar verða í boði.

2. janúar - Vetrarmótaröðin (13)
Laugardaginn 2. janúar fer fram púttmót á Vetrarmótaröð GM með hefðbundnu sniði. Húsið opnar klukkan 9:00 en byrjað verður að pútta um klukkan 9:30. Skráningu lokar klukkan 10:30 en þá verða allir kylfingar að hafa hafið leik. 

Mótsgjald er 500 kr og er skráning á golf.is eða einfaldlega með því að mæta á svæðið. 

Veitingasala á Vetrarmótaröðinni er í höndum Foreldraráðs GM en salan er liður í fjáröflun barna og unglinga GM. 

JÓLAKVEÐJA

23.12.2015

Okkar bestu óskir um gleðilega hátíð og farsæld á komandi ári með kærum þökkum fyrir samskiptin á liðnum árum.

Stjórn og starfsfólk Golfklúbbs Mosfellsbæjar

AÐALFUNDUR GM 2015

17.12.2015

Aðalfundur Golfklúbbs Mosfellsbæjar var haldinn þriðjudaginn 15. desember í hátíðarsal Lágafellsskóla. Góð mæting félagsmanna var á fundinn en 61 félagsmaður mætti til þess að fara yfir rekstur og framkvæmdir á vegum félagsins á síðasta rekstrarári. Góður andi var á meðal fundarmanna en m.a. voru allar tillögur sem lagðar voru fyrir fundinn voru samþykktar með öllum greiddum atkvæðum. Aðalfundarstörf voru með nokkuð hefðbundnum hætti en Guðjón Karl Þórisson formaður fór yfir skýrslu stjórnar ásamt því að Vala Valtýsdóttir gjaldkeri fór yfir rekstrarreikninga klúbbsins.

Rekstur GM árið 2014-15 einkenndist að miklu leiti af þeirri sameiningu sem áttir sér stað fyrir tímabilið. Afkoma ársins var 34,8 milljónir en inn í þeirri tölu eru fyrstu styrkir sem berast frá Mosfellsbæ vegna byggingar Íþróttamiðstöðvar. Gunnar Ingi Björnsson framkvæmdastjóri fór yfir rekstraráætlun klúbbsins til 5 ára en ljóst er að bygging Íþróttamiðstöðvar er mikið verkefni fyrir GM og verður að huga vel að öllum rekstri klúbbsins til að taka á við það.

Nær óbreytt félagsgjöld voru samþykkt og mun því gjald fyrir aðild að klúbbnum með leikheimild á báðum vallarsvæðum hans verða 89.990 eins og árið 2015. Gjald fyrir aðild með leikheimild í Bakkakoti var hækkað upp í 54.990 enda það gjald staðið nær óbreytt frá árinu 2008. 

Sjá má gjaldskrá félagsgjalda með því að smella hér

Ekki var gengið til stjórnarkosninga á þessum aðalfundi þar sem fyrsta stjórn GM var kosin til 2 ára og mun því sitja fram að aðalfundi árið 2016.

Nokkur mál voru tekin fyrir undir liðnum önnur mál sem fjörugar umræður sköpuðumst um. Mörg þessara mála eru mikil hagsmunamál fyrir klúbbinn og er ljóst að GM mun kynna nokkrar breytingar á starfsemi sinni á næsta ári. Það er ljóst að spennandi tímar eru að renna upp fyrir Golfklúbb Mosfellsbæjar og félagsmenn GM.

VETRARMÓTARÖÐIN 19. DESEMBER

17.12.2015

Nú er Hlíðavöllur orðinn nánast auður og því leikhæfur á ný. Stefnt er að því að leika Vetrarmót 11 utandyra á laugardaginn. Ræst verður út á öllum teigum klukkan 10:30 en vélaskemman á Hlíðavelli mun opna klukkan 9:00. Ef veðuraðstæður munu ekki bjóða upp á golf utandyra verður haldið púttmót í vélaskemmunni.