Opnunartími íþróttamiðstöðvar - Golfherma
Mánudag til fimmtudags 09:00 - 23:00
Föstudag og laugardag 09:00 - 21:00
Sunnudag 09:00 - 22:00
Golfæfingar eru í gangi á eftirfarandi tímum í vetur:
Mánudagar: 15:00 - 20:00
Þriðjudagar: 14:45 - 19:00
Miðvikudagar: 15:00 - 21:00
Fimmtudagar: 15:00 - 21:00
Föstudagar: 16:00 - 18:00
Íþróttamiðstöðin Klettur - frábær félagsaðstaða
Íþróttamiðstöðin Klettar var tekin í notkun vorið 2017 sem hýsir skrifstofur klúbbsins ásamt félags og æfingaaðstöðu.
Af hverju er þetta kallað íþróttamiðstöð?
Golfvöllur er í raun eitt stærsta íþróttamannvirki í hverju sveitarfélagi ef litið er til flatarmáls. Á hverju ári er áætlað að leiknir séu um 30.000 golfhringir á Hlíðavelli að sumri til og yfir vetrartímann eru þeir áætlaðir á bilinu 2.000—3.000 talsins. Eins og önnur íþróttahús getur golfvöllur mjög illa gegnt hlutverki sínu nema að við hann sé nauðsynleg aðstaða. Í grunninn má segja að ný íþróttamiðstöð gegni hlutverki anddyris að því íþróttamannvirki sem golfvöllur sannarlega er. Í Kletti má finna alla skrifstofuaðstöðu fyrir starfsmenn GM. Þar er að finna rúmgóðan hátíðarsal til að taka á móti stærstu golfmótum hvers sumars ásamt allri nauðsynlegri aðstöðu vegna veitinga og móttöku hópa.
Á neðri hæð hússins fullkomna aðstöðu til æfinga golfs innandyra. Þar eru m.a:
- 5 fullkomnir golfhermar
- Ríflega 50 m2 innipúttflöt
- Aðstaða til að slá í net innanhúss.
- Fyrirlestrarsalur fyrir iðkendur og þjálfara
- Aðstaða fyrir þjálfara og leiðbeinendur
Leitast er við að bjóða öðrum hópum aðstöðu í húsinu til almennrar útivistar og hreyfingar. Svæðið er tengt inn á stígakerfi Mosfellsbæjar og munu þar skapast mörg skemmtileg tækifæri fyrir tengingar við fleiri íþróttir og útvist í hjarta Mosfellsbæjar.
Lóðin, húsið og ferlið
Við hönnun hússins var leitast við að búa til framtíðarhúsnæði sem nýtast mun félagsmönnum um ókomna tíð. Húsið er tvílyft og verður öll hefðbundin aðstaða á efri hæðinni en á neðri hæð hússins verður aðstaða til æfinga og iðkunar golfs allt árið um kring.
Við hönnun hefur verið leitast við að skapa skemmtilega umgjörð fyrir félagsmenn og gesti klúbbsins og þá kannski sérstaklega í kringum mótahald enda Hlíðavöllur að komast í hóp fremstu golfvalla á Íslandi og erum við spennt að bjóða stærstu golfmót landsins velkomin í Mosfellsbæ.
Húsið er afar glæsilegt og situr beint yfir 10. og 18. braut Hlíðarvallar. Við blasir óviðjafnalegt útsýni yfir völlinn, Leirvoginn, Faxaflóann og auðvitað Esjuna. Á fallegum sumardegi má svo sjá Snæfellsjökul bera við sjóndeildarhringinn.
